

	الثلاثاء 14/04/1447 هـ الموافق 07/10/2025 م الساعة 01:47 توقيت الصلاة العصر 14:57

مقالات

A A A A A

العقد الفريد

آسفين.. حقك علينا يا دجاج!

مفرج الدوسري

2014/01/11

08:40 م

شكرا لتصويت

التقيم

التقيم الحالي 0/5

محكمة الجنايات تقضي بحبس ثلاثة احداث سنتين وذلك عن تهمة سرقة دجاج من جاخور، ماشي، تطبيق القانون مطلوب على الجناة اياً كانوا ومهما كانت جريمتهم وان كنا نتمنى لو تم النظر لهؤلاء الاحداث بعين الرأفة والرحمة كونهم «احداث» وان يؤخذ عليهم تعهد بالانضباط وحسن السلوك بدلا من احالتهم للمحاكم وضياع ثلاث سنوات من اعمارهم بسبب «كم دجاجة»!.
٭٭٭
على طاري سرقة الاحداث لـ«دجاج الجاخور» ما سمعنا عن تحويل احد من تجار الاغذية الفاسدة اللي خلو الشعب ياكل كل انواع الدجاج المنتهي الصلاحية واللحوم اللي ما تصلح للاستهلاك الآدمي والاسماك النافقة والبيض الفاسد والمعلبات المعفنة الى النيابة، ما سمعنا عن القاء القبض على تجار الفساد اللي حتى الاطفال ما سلموا منهم قاموا يوردون حلويات فاسدة وحليب اطفال منتهي وادوية مقلدة، ومن كثر ما تجار الفساد راهين في الاستيراد وضامنين ما راح احد يحاسبهم قاموا ما يتعاملون بالكيلوات يتعاملون بالاطنان، والصحف تكتب، المخزن الفلاني ضبط فيه عشرين طن دجاج فاسد، والمخزن العلاني ثلاثين طن لحوم فاسدة، وعشر اطنان، وخمس اطنان، وانت رايح شغالين ولا هامهم احد، طيب هالمخازن اللي فيها هالاطنان منهم اصحابها والا ما لها والي؟ علمونا هالمخازن اللي فيها هالبضاعة الفاسدة فيها عمال وحراس والا هدد؟ طيب هالعمال والحراس ما لهم معزب والا يشتغلون بلاش؟ يا عمي طراقين وكم لشطة من عقال مسؤول محترم يعترفون بكل شيء حتى لو تبون اسم ربان الباخرة اللي حمل البضاعة راح يطلعونه، لكن قولوا ما نبي نمسكهم وخلصونا!
٭٭٭
على طاري سرقة الاحداث لـ«دجاج الجاخور» عسى توصلتوا الى السبب الرئيسي لتفتت الاسفلت؟ يقولون السبب «الامطار الحمضية»! ما شاء الله والله سبب مقنع، يعني فساد بعض المقاولين ما له شغل، ولا تقليل نسبة «القار» في الاسفلت لها دخل، حمضي! المطر حمضي وشلخ الشوارع وشققها، يعني بدل لا نصلي صلاة الاستسقاء وندعي بزيادة المطر نبتهل الى الله عز وجل ان يقطع عنا الغيث علشان الشوارع لا تتشقق وينكشف المقاول الفاسد، حمضي! المطر حمضي، ما اشوف الدول اللي فيها مفاعلات نووية وسماها مليانة من ابخرتها تشققت شوارعهم مع ان المطر يصب عليهم ليل ونهار، ليش ما صار مطرهم حمضي؟ تسترتوا على فساد تجار الاغذية والحين تبون تبررون فساد مقاولين الشوارع؟ يا عمي تكفون صيدوا لو فاسد واحد من شان الله!
٭٭٭
على طاري سرقة الاحداث لـ«دجاج الجاخور» شصار على استاد جابر؟ سمعنا فيه تشققات خطيرة في اساساته ولازم تهدمونه، صحيح هالكلام؟ طيب ليش ما تثمنونه للمقاول؟ يعني تثمنونه وتعطون فلوس التثمين للمقاول بعدين ترسون على نفس المقاول مناقصة الهدم وعقب ما يهدمه تعطونه مناقصة بنيانه من جديد! قولوا ليش؟ انا اقول لكم المقاول صار عنده خبرة ويعرف علة الاساسات وراح يعطينا استاد جديد ما فيه عيوب ولا مشاكل احسن من ترسية الهدم والبنيان على مقاول جديد ما يعرف اسباب ازالة الاستاد ويغلط نفس الغلطة، بعدين ما فيه داعي تكثرون الاسئلة، كثرتها تضيع الوقت، والمقاول ما له علاقة باللي حصل في الاساسات من تشققات الغلطة غلطة التربة اللي ما تحملت ثقل الاسمنت! بالضبط نفس غلطة الشوارع اللي ما تحملت الامطار الحمضية ونفس غلطتنا يوم كلينا الاغذية الفاسدة ونفس غلطتنا يوم انتخبنا مجلسين مبطلين، العلة فينا!

< نقطة شديدة الوضوح:
يقولون اللي يبلغ عن الفساد بيعطونه مكافأة! ديروا بالكم، هذا فخ، اللي يبلغ راح يسجنونه، ربعنا ونعرفهم!

مفرج البرجس الدوسري
maldosery@alwatan.com.kw

أخبار ذات صلة dot4line

التعليقات الأخيرة

All Comments

أكثر المواضيع مشاهدة

مقالات ذات صلة بالكاتب

Tweets by WatanNews !function(d, s, id) { var js, fjs = d.getElementsByTagName(s)[0], p = /^http:/.test(d.location) ? 'http' : 'https'; if (!d.getElementById(id)) { js = d.createElement(s); js.id = id; js.src = p + "://platform.twitter.com/widgets.js"; fjs.parentNode.insertBefore(js, fjs); } } (document, "script", "twitter-wjs");

276.0085


موقع الوطن الإلكترونية – حقوق الطبع والنشر محفوظة