

	الثلاثاء 14/04/1447 هـ الموافق 07/10/2025 م الساعة 04:09 توقيت الصلاة الفجر 4:25

مقالات

A A A A A

العقد الفريد

الله لا يوفقهم.. قولوا آمين!! (2 – 2)

مفرج الدوسري

2015/01/07

09:43 م

شكرا لتصويت

التقيم

التقيم الحالي 0/5

مثل بداية المقال السابق يا مواطن قول آمين الله يحفظك (الله لا يوفق كل متنفذ أو مسؤول في موقع خدمات عامة تقاعس عن أداء مهامه وكان سبباً في معاناة المواطن، الله لا يوفقهم واحد واحد نفر نفر فرد فرد) آآآآمين، اللهم اجعلها ساعة اجابة.
٭٭٭
في المقال السابق اشرنا الى الجزئية التي تشير الى (مراجعة آليات تسعير السلع) في الدراسة (الخرطي) التي نشرتها جريدة الجريدة واللي اعدها الفريق الاقتصادي لوزارة المالية والتي تتلخص في الفقرة التالية (بينما اكد وزير المالية انس الصالح في مقدمة الدراسة التي ارسلت الى مجلس الامة ان تلك المقترحات ستخضع للملاءمات السياسية والتوافق بين السلطتين على عدم المساس بالمواطنين ذوي الدخول المحدودة دعت الدراسة الى مراجعة آليات تسعير السلع والخدمات العامة في الوقت الحالي بحيث يعاد تسعيرها في ضوء تكلفتها الحقيقية).
تناول اليوم جزئية (الخدمات العامة) اللي تعتبر كارثة من الكوارث غير الطبيعية، بنتكلم عن (تسعير الخدمات العامة في الوقت الحالي) ركز معاي يا مواطن يبون يعيدون تسعير الخدمات العامة.. الله.. والخدمات العامة اللي يتكلمون عنها اللي يسمعهم يقول الخدمات الطبية على مستوى (الجون هوبكنز) ما يدرون ان مستوصف الرقة كمثال صار له دهر يرممونه وللحين ما خلص تقول يبنون مجمع ابحاث علوم فضاء والمواطن يحتاج موعد شهرين علشان يشلع ضرس مسوس والسرير في المستشفى عليه بالحسرة! الظاهر ما عندهم خبر ان الخدمات التعليمية حدث ولا حرج ضحيتها الطالب وولي امره اللي يدفع نص معاشه على حفلات التكريم في المدارس وعلى المدرسين الخصوصيين والهرم مقلوب من قبل الربعي الله يرحمه ولا ظنيت انه بيتعدل!! ترى الاخوان فاهمين الخدمات العامة غلط، لا يكون المقصود (بالخدمات العامة) هالطوابع اللي تترس المعاملات في الدوائر الحكومية ويختمها موظف أو موظفة (الغمس) تارس عيونه ما له خلق يشتغل يعطل المعاملات ويؤجل المراجعات ويضيع مصالح الناس وأوقاتها!
يا عمي بلا كلام فاضي عن أي خدمات تتكلمون عن الشوارع اللي كل حفرة أكبر من الثانية وإلا عن الحدائق المهملة اللي يزرع فيها المقاول شجرتين وياخذ الفلوس ويخليها تموت والا عن الاندية الرياضية التعيسة والا عن المطار اللي يخر في الشتاء وينترس غبار في الصيف والا عن سوء رقابة البلدية واهمالها والا عن التنفيع والترقيع والا عن الهدر والنهب، صحيح على طاري الشوارع في الدراسة فقرة تبشركم بإضافة (رسوم على استخدام بعض الطرق الرئيسية تتم جبايتها الكترونيا)!! بصراحة أنا ما أدري شلون راح تنطبق هالفقرة اذا الطرق مسكرة من الزحمة والسيارات واقفة ما تمشي هل راح تتم (جبايتها الكترونيا) وتحاسبون المواطن على الوقت اللي قضاه واقف بالشارع والا على المسافة اللي ما مشتها سيارته وهي واقفة والا ايهما أطول! بصراحة اللي عمل الدراسة وقدمها يحتاج تتعمله عشرين دراسة على شأن نعرف شلون يفكر ويخطط! اما مجلس الامة اللي قبلها (فمرفوع عنه القلم)؟!

- نقطة شديدة الوضوح:

المواطن ما عنده مانع ولا اعتراض على الرسوم ولكن قبل لا تفكرون فيها عطوه حقوقه اللي عندكم، اذا تشوفون ان المواطن عليه واجبات تذكروا ان له حقوقاً، تعدلوا وسنعوا خدماتكم بعدين طالبوه بالرسوم (وجبايتها) اما لص لا ذمة ولا ضمير يبوق الديزل صار له سنين ولما انفضح تطلعون الحرة في المواطن معصي!

مفرج البرجس الدوسري
maldosery@alwatan.com.kw

أخبار ذات صلة dot4line

التعليقات الأخيرة

All Comments

أكثر المواضيع مشاهدة

مقالات ذات صلة بالكاتب

Tweets by WatanNews !function(d, s, id) { var js, fjs = d.getElementsByTagName(s)[0], p = /^http:/.test(d.location) ? 'http' : 'https'; if (!d.getElementById(id)) { js = d.createElement(s); js.id = id; js.src = p + "://platform.twitter.com/widgets.js"; fjs.parentNode.insertBefore(js, fjs); } } (document, "script", "twitter-wjs");

440.0158


موقع الوطن الإلكترونية – حقوق الطبع والنشر محفوظة