

	الثلاثاء 14/04/1447 هـ الموافق 07/10/2025 م الساعة 07:30 توقيت الصلاة الفجر 4:26

مقالات

A A A A A

العقد الفريد

وهم.. كل المشاريع وهم!

مفرج الدوسري

2014/02/10

09:41 م

شكرا لتصويت

التقيم

التقيم الحالي 5/0

أوضاع الوطن لا تسر ولسان حال المواطن يشكو الهم والضيم

تقشف يا مواطن بارك الله فيك تقشف، واترك عنك الترف اللي انت عايش فيه، صار لك سنين وانت عايش في ربيع الحين لازم تتقشف وتساعد الحكومة على التقشف، تقشف علشان نقدر نبني مطارا في جمهورية بنين، تقشف علشان نبني مدارس ومساكن في العراق كفارة عن غزونا له سنة 1990، تقشف علشان نبني محطات كهرباء في لبنان، تقشف علشان نبني جامعة في القوقاز، تقشف علشان نشق طرق في افريقيا، تقشف علشان نبني مستشفيات في «المزهدة»! تقشف يا مواطن لان الحكومة في عام 2012 عطت دول آسيا منحاً ومساعدات (5.5) مليارات دولار واعتقد ما يرضيك نوقف هالمساعدات عيب فشلة لازم نكمل جميلنا حتى لو نقعد على الحديدة! عيب نترك الاشقاء في افريقيا وآسيا من غير مساعدات، شفايدة هالمليارات اذا «ما هايطنا» فيها عندهم، قدرنا يا مواطن الله يسلمك نكد على دول العالم ونبيني ونعمر فيها، اعتبرها صدقة جارية ولك الاجر، ما تبي الجنة؟ الحكومة تبي تدخلك الجنة!
٭٭٭
ما عرفنا لك يا مواطن تبي تنمية وتبي وتبي رفاه، يا اخي حدد شتبي ترى ازعجت حكومة التنمية والتخطيط، اذيتها من كثر ما تشتكي ليل ونهار وبيدك قائمة طويلة عريضة من الطلبات، شقاصرك قولي؟ شفيها المستشفيات؟ شزينها ما فيها شي بس العلة فيك وفي المواطنين اللي ما يمرضون الا جميع، ليش ما تمرض انت الصبح وجارك يمرض العصر وجارك الثالث يمرض المغرب، ليش اهل المنطقة ما يمرضون بالدور علشان ما تصير زحمة في المستشفيات، ليش اذا مرض جارك تمرض معاه، متى بتتعلمون النظام؟ بعدين شنو هالحرص المبالغ فيه على تعليم عيالك وبناتك والاهتمام الزايد في نجاحهم، لا يكون تبي تدخلهم الجامعة؟ يا حبيبي يكفي في كل اسرة واحد جامعي والبقية كافي شهادة المتوسطة ويدبرون حالهم يروحون الجيش يروحون الشرطة يصيرون حراس في بنايات التجار وأمن في شركاتهم، ما يصير عيالك يصيرون مثل عيال التجار في الملبس والمركب والمنصب والتعليم، لازم يبين الغني من الفقير في هالبلد، وهذا تطبيق عملي لتنويع مصادر الدخل مثل ما قالت الحكومة، بصراحة الله يكون بعون الحكومة، ازعجتها يا مواطن واشغلتها بقضية السكن، يا أخي ترى عيالك مو لازم يكون لكل واحد منهم بيت بروحه، الافضل يضفهم بيت واحد، لا تصير عسر، ما تدري ان هذا مو من عادات الكويتيين ولا من تقاليدهم، والا نسيت ان ابوك وجدك وعمامك كانوا ساكنين في بيت واحد، خل عيالك يسكنون وياك، الجمعة معزة مثل ما يقولون، وبطل فسق عندك ثلاث واربع سيارات، ترى النعمة زوالة، كافي سيارة وحدة للبيت كله، الصبح الله لا يهينك توصل عيالك وبناتك الطلبة للمدارس، وعلى دربك تودي عيالك الكبار دواماتهم وآخر النهار تروح تجمعهم واحد واحد، راح تشعر بالمتعة الاسرية وبتوفر مصاريف وراح تشعر انك شخص فاعل في المجتمع، حاول تتقشف وتقتصد، وبطل سفر أنت وعيالك، اذا بتصيف صيف في قلمة شايع والا في مزارع الوفرة والا في جزيرة فيلجا، ارخص واوفر، يا اخي لازم تساعد الحكومة علشان تقدر تنفذ مشاريع التنمية اللي جزء منها مساعدات آسيا وافريقيا، انت ايام الرفاه قبل التقشف لما كنت تروح آسيا والا افريقيا ويقولون لك هذا الشارع مبني بفلوس كويتية ما كنت تنسى شوارعنا المكسرة وتحس بالفخر، اكيد، ولما تنزل في مطار مبني بمنحة كويتية تقدم جوازك يختمه قوقازي والا افريقي تشعر بالانتعاش! هذا امتداد لزمن العطاء لكن راح يكون على حسابك في قادم الايام، لان زمن الرفاه انتهى، وصرنا في زمن التقشف، والسنوات الجاية كحيلة، وراح يجي اليوم اللي تتبادل فيه مع عيالك دشاديش وغتر وطواقي وفنايل والله لا يغير علينا عندنا حرية نقول اللي نبي وهم يسوون اللي يبون!

< نقطة شديدة الوضوح:
الحكومة اللي تبحث عن رضا تاجر على حساب تنمية وطن، وتشتري صمت نائب عن كشف الحقائق للشعب الله يكون بعون رئيسها، والله يعوض الوطن والشعب افضل منها، أوضاع الوطن ما تسر واللي ما يشوف اعمى بصيرة، ولسان حال المواطن يشكي الهم والضيم، كله بسبب بعض المستشارين اللي ما تسرحهم مع….!

مفرج البرجس الدوسري
maldosery@alwatan.com.kw

أخبار ذات صلة dot4line

التعليقات الأخيرة

All Comments

أكثر المواضيع مشاهدة

مقالات ذات صلة بالكاتب

Tweets by WatanNews !function(d, s, id) { var js, fjs = d.getElementsByTagName(s)[0], p = /^http:/.test(d.location) ? 'http' : 'https'; if (!d.getElementById(id)) { js = d.createElement(s); js.id = id; js.src = p + "://platform.twitter.com/widgets.js"; fjs.parentNode.insertBefore(js, fjs); } } (document, "script", "twitter-wjs");

351.0121


موقع الوطن الإلكترونية – حقوق الطبع والنشر محفوظة