فنون  
نسخ الرابط
 
   
   
 
  A A A A A
X
dot4line

عن المواقف التي حدثت لهم و.. أثارت غضبهم

الفنانون.. البعض منهم سريع الغضب والآخر أعصابه بارررردة

2014/01/26   06:26 م
شكرا لتصويت

التقيم التقيم الحالي 5/0
لمياء طارق - ابراهيم الشيخلي - فاطمة العبدالله - علي عبدالله - عبدالله العميري - مشاري المجيبل - هاني ابل
  لمياء طارق - ابراهيم الشيخلي - فاطمة العبدالله - علي عبدالله - عبدالله العميري - مشاري المجيبل - هاني ابل



لمياء طارق: جُنَّ جنوني لما اللبيسة «خشت» هدومي عشان ما أسافر!

إبراهيم الشيخلي: اثنين عند الإشارة طايحين فيني خز ويضحكون.. فعصّبت عليهم

فاطمة العبدالله: في مطار «فينس» كل شوي فصخ وألبس.. فطار برج مخي!

علي عبدالله: في المطار ماركبوني الطيارة لأن صلاحية جواز سفري منتهية.. عصبت واحترق دمي

عبدالله العميري: ارتفع ضغطي فاضطريت ادفع فلوس التذكرة مرتين في رحلة لندن

مشاري المجيبل: انصدمت لان أبوي ماخذ الأهل كلهم لمزرعته بالوفرة.. ونساني


كتبت تحرير القلاف:

يختلف كل منا عن الاخر في ردة فعله، تجاه موقف او حدث يحصل له، فالبعض يضحك والبعض الاخر يغضب. «الوطن» اتجهت بسؤال محدد «عن المواقف التي حدثت لهم و.. أثارت غضبهم» ووجهته لعدد من الفنانين والمنتسبين للوسط الفني، فحصدنا لكل منهم حكاية وموقفاً مع الحياة.. وفي ما يأتي التفاصيل:
بدأت الممثلة لمياء طارق قائلة: «انا من الناس اللي نادر جدا ما اعصب، ومن الصعب ان يستفزني احد بسهولة، محد يقدر ينرفزني، الموقف اللي صارلي وانا في العاصمة الاردنية عمان، لتصوير مشاهدي لمسلسل «ارواح» وكان في اللوكيشن فنانات عظيمات، جن جنوني لما اللبيسة «خشت» هدومي عشان ما اسافر!».
واضافت لميا: «والمشهد كان داخل البحر وانا اغرق بنتي، ووحدة من اللبيسة تعمدت تأخر ملابسي و«تخشهم» عني عشان ما اسافر ثاني يوم، وأبقى عندهم مدة أطول، هالشي نرفزني وايد، لاني ما احب أجل موعد طيارة او مشاوير مهمة، وبوقتها ثارت أعصابي على الكل، وعصب عليّ المنتج، وأنا عصبت على المخرج ومدير اعمالي، لكني صورت المشهد والبنت اعتذرت وسامحتها، وفي مثل ينقال «اتق شر الحليم اذا غضب» هذا ينطبق عليّ».

والله إحراج

الممثل ابراهيم الشيخلي قال: «اثنين واقفين يمي، يطالعوني ويضحكون «عطيتهم طاف».. كنا حزتها عند الاشارة واقفين وهالاثنين عند الاشارة طايحين فيني خز ويضحكون.. فعصبت عليهم حيل شيضحكهم، فتنرفزت واااايد، واشرتلهم حتى ينزلون جام شباك السيارة، ولما نزلوها «قلتلهم خير» فقال لي واحد منهم بحسن نية ان ادوارك تضحكنا، انا وايد انحرجت و.. ماعرفت شنو أرد».
المذيعة فاطمة العبدالله قالت: «انا عصبية بطبعي فعادي 24 ساعة معصبة وزوجي حمد نفس الشي نار وشرار، لما سافرت شهر العسل اهو مو شهر كان اسبوع، كنا في مطار «فينس» كل شوي أفصخ وألبس.. فطار برج مخي! وكل شوي تفتيش وكان جدامي طابور طويل، وزحمة وتحملت أعصاب زوجي وتحلطمه، لان معترض على كل شي حتى الجو والبرد والمطر، ولما وصلنا عند باب الطيارة، انا فصلت الفصلة الكبيرة جان اقوله: ما أبي أركب الطيارة يعني مابي اركب «كنت ابيها من الله ما ارجع الكويت، بس بالنهاية راضاني ووعدني انه ما يتحلطم ومشت الامور وركبنا الطيارة وردينا ميتين ضحك على فصلتنا احنا اثنينا».

جواز السفر

المطرب علي عبدالله قال: «كانت عندي سفرة عمل ضرورية لاحياء حفل في قطر، وانا رايح المطار مادريت ان جوازي نهايته بعد يوم واحد من السفرة، ومارضوا اركب الطيارة وكان يومها «ويك اند» واللي صار بعدها اني مارحت لأن ماكنت مجدد ولاشي وتكنسلت الحفلة، وهالموقف خلاني اعصب على نفسي، ويحترق دمي، لدرجة ان ربعي اللي معاي قالو اول مرة نشوفك جذي، واكثر شي عصبني اهمالي من بعدها صرت حريص عشان مايتكرر معاي نفس هالموقف».
وقال المخرج عبدالله العميري: «اللي أذكره عدل وصج رفع ضغطي وايد، ووصلت حدي لما كنت بسافر لندن مع ولد خالتي فهد العلي، وكنا متأخرين عن الموعد خمس دقايق بس، وكان في موظف كاونتر احدى الخطوط موراضي يدخلنا، لكن بعد العصبية والنجرة حولنا التذكرة لي بزنس.. يضحك ويقول كنت زعلان دفعت فلوس التذكرة مرتين».

أبوي هدني

اما الممثل مشاري المجيبل ضحك وقال: «وانا صغير كان عمري تقريبا 13 سنة، ابوي قالي يالله قوم بنروح لمزرعته بالوفرة وقلت له اوكي على ما البس، وانا عالبراد رحت سبحت وبدلت، وطلعت ادور ابوي مالقيته، انصدمت انه ماخذ الاهل كلهم ونساني، طبعا عصبت حيل لاني كنت وايد صغير، المهم بعدها قعدت عند الخدامة لي المغرب، اللي حصل بعد هذا كله ان ابوي اتصل على خالي وقاله يمرني ويوديني معاه لان كان رايح لهم، وطبعا كان يوم متعب نفسيا حقي ولما وصلت عندهم قعدت بروحي زعلان مابي اكلمهم».
وختمها المخرج هاني ابل وقال: «والله انا مو عصبي كلش يمكن اتنرفز بس ما اعصب بس من المواقف اللي خلتني اتنرفز، كنت بسافر مع رفيجي البحرين شهر 12 اللي طاف عشان نحضر بطولة، وكنا متفقين قبلها باسبوع ان نسافر بسيارة ياني قبل السفرة بيوم وقالي خلنا نسافر بطيارة، انا حيل تنرفزت لكن بنفس الوقت الموقف كان يضحك بالنسبة لي، لأني متأكد ان راح يغير رأيه رفيجي ولأني اعرفه عدل ما انصدمت كلش».


أخبار ذات صلة dot4line
التعليقات الأخيرة
dot4line
 

!function(d, s, id) { var js, fjs = d.getElementsByTagName(s)[0], p = /^http:/.test(d.location) ? 'http' : 'https'; if (!d.getElementById(id)) { js = d.createElement(s); js.id = id; js.src = p + "://platform.twitter.com/widgets.js"; fjs.parentNode.insertBefore(js, fjs); } } (document, "script", "twitter-wjs");
102.0047 		 
 
 
إعلن معنا
موقع الوطن الإلكترونية – حقوق الطبع والنشر محفوظة
 
Top