

	الثلاثاء 14/04/1447 هـ الموافق 07/10/2025 م الساعة 10:54 توقيت الصلاة الفجر 4:26

مقالات

A A A A A

العقد الفريد

العلة في الشعب!!

مفرج الدوسري

2014/09/01

09:42 م

شكرا لتصويت

التقيم

التقيم الحالي 0/5

نشكو الأزمات والمشاكل وننسى أن وراء كل مشكلة مرتشياً!!

يا كثر مطالبنا ونقدنا وعتبنا ولومنا، العيون مفتوحة على كل شيء في الديرة، وعميا عن اخطائنا، حتى اصبح اغلبنا يبحث عن الاصلاح، وهو في الواقع ما يبيه ويتكلم عن الفساد وهو احد اركانه اذا ما كان اساسه!! طبعا هالكلام ما يرضي اصحاب الهوى والمصالح والمنتفعين من الفساد اللي ألسنتهم اطول من سور الصين لما يتكلمون عن الاصلاح ويبلعونها لما يواجهم احد بالحقيقة، من يبي الاصلاح يبدأ بنفسه وما ع ليه من غيره،ولو طبق كل مواطن هذا الامر راح ينصلح الحال.
٭٭٭
خلونا نعترف في البداية بكل شجاعة ان العلة فينا كشعب على الاقل ثمانين بالمية من تصرفاتنا هي سبب مشاكلنا، خلوا الحكومة تستريح على جنب وحطوا البرلمان على الجنب الآخر علشان نتكلم بكل صراحة عن افعالنا كمواطنين نبي نعرف وين الخلل قبل لا نرمي نتائجه على الآخرين، وقبل لا نقعد نصيح وندور شماعة نعلق عليها اخطائنا، نبي نأخذ العلاج في الخارج كنموذج من نماذج فساد بعضنا وهو بالطبع أمر مخجل ومعيب، يستميت البعض منا ويجيب تقارير طبية مضروبة ويروح يمصمص خشوم النواب ويحبب رؤوسهم علشان يتوسطون له في رحلة علاج سياحية وهو يمشي على زندة الثور، لا يعرف المخافة من الله سبحانه ولا يخشى ان الله عز وجل يبتليه في صحته أو يبتلي أحد من افراد اسرته لانه سلب حق غيره وحرمه من فرصة العلاج في الخارج اللي هو في أمس الحاجة لها، يعني العلة فينا.
٭٭٭
السطو على حقوق الآخرين صورة مخزية من صور فسادنا اللي يندا له الجبين، كم من كفاءة مشهود لها بالنزاهة تملك الشهادة والخبرة وحسن الاداء قتلها الظلم ودب اليأس في نفس صاحبها بسبب الاحباطات المتتالية، وبصراحة ما ينلام، فجأة يصير رئيسه أو مديره في العمل واحد متعين بعده لا يملك شهادة وما عنده خبرة واسلوبه في التعامل صفر، ليش؟ عنده واسطة! طيب لو كان عند هذا المواطن ذمة، أو عند اللي توسط له ضمير أو يملك اللي فتح الباب للواسطة ذرة من العدل والانصاف ما انظلم مواطن ولا ضاع حق، ولو خذينا الامر بالتدرج راح نلقى ان المواطن هو من سعى واستمات علشان يسلب حق غيره، يعني العلة فينا!
٭٭٭
نشكي من انتشار الجريمة وكثرة السرقات وترويج المخدرات ونتناسى ان السبب مواطن فاتح له شركة وهمية ويجيب من هالعمالة ويقط في الشارع علشان يأخذ كم فلس، يعني يأكل سحت ويضر بأمن البلد بعين يشتكي! واذا سألته عن سبب هذا التصرف المشين يرد عليك بكل تفاهة «حالي من حال غيري»! طيب اذا غيرك ما يخاف الله سبحانه ولا يهمه أمن ديرته تسوي مثله؟ علتنا منا وفينا!
٭٭٭
يأخذ بعض تجارنا من عديمي الذمة والضمير مناقصة ولا يكملها والمصيبة ان اللي يوقع له على استكمال كل مرحلة من مراحل المشروع مواطن مرتشي، ونتذمر من الزحمة وكثرة السيارات وننسى ان المرتشي اللي يأخذ مقابل تسهيل الحصول على رخصة قيادة مبلغ وقدره هو السبب، نتحدث عن فساد الاغذية ولا نتحدث عن المرتشي اللي سهل دخولها ولا عن المرتشي اللي سمح بتخزينها ولا عن المرتشي اللي سمح بتخزينها ولا عن المرتشي اللي فحصها واجازها ولا عن المرتشي اللي سمح ببيعها للمواطن بشكل مباشر، ونتحدث عن سرقة الادوية من المستشفيات وعدم وجود البعض منها ولا نتحدث عن المرتشي اللي سربها الى خارج المستشفى ويا كثر الامثلة عن الرشوة والمرتشين اللي هم في الاساس مواطنين، علتنا فينا!
٭٭٭
ما نبي ندفع فواتير الكهربا والماي والهاتف وما نحرص على نظافة البلد ولا نحترم القانون، وعيالنا ما يكفي سياراتهم بانزين الكرة الارضية من الفرارة في الشوارع، ونتسلف علشان نسافر ونشتري اشياء ما نحتاجها ونحمل ظهورنا بالاقساط، ونعشق المظاهر، وبعدين نشتكي ان الراتب ما يكفي! ما نهتم في شيء ولا يهمني شيء حتى عيالنا اللي نتهم وزارة التربية بالتقصير في تعليمهم هادينهم ولا نسأل عنهم، ننتقد كل شيء من غير لا نعدل من أنفسنا بالمقام الأول!!

< نقطة شديدة الوضوح:
خلك ابخل شخص في سوق الكلام
وخلك اجبن شخص في طعن القفا
وان بغيت تكون في رأس السنام
احسب ألف حساب من كلمة أفا

مفرج البرجس الدوسري
maldosery@alwatan.com.kw

أخبار ذات صلة dot4line

التعليقات الأخيرة

All Comments

أكثر المواضيع مشاهدة

مقالات ذات صلة بالكاتب

Tweets by WatanNews !function(d, s, id) { var js, fjs = d.getElementsByTagName(s)[0], p = /^http:/.test(d.location) ? 'http' : 'https'; if (!d.getElementById(id)) { js = d.createElement(s); js.id = id; js.src = p + "://platform.twitter.com/widgets.js"; fjs.parentNode.insertBefore(js, fjs); } } (document, "script", "twitter-wjs");

280.0146


موقع الوطن الإلكترونية – حقوق الطبع والنشر محفوظة