

	الثلاثاء 14/04/1447 هـ الموافق 07/10/2025 م الساعة 09:43 توقيت الصلاة الفجر 4:26

مقالات

A A A A A

العقد الفريد

ما نبي الحكم.. بنمشي!

مفرج الدوسري

2014/01/01

08:58 م

شكرا لتصويت

التقيم

التقيم الحالي 0/5

السيد مرزوق الغانم رئيس مجلس الامة الموقر قال في خطابه الشهير اللي وجهه الى اسرة الحكم الكريمة «سؤال صريح ومباشر، وسؤال نحتاج الى اجابة عليه، تبون الحكم والا ما تبون، متمسكين بحكمكم وبتحملون مسؤوليته والا بايعينه، اذا بايعين الحكم قولوا لنا، اذا بتفلونها قولوا لنا، خل الناس تخطط لمستقبلها على هالاساس!» طبعا كلام بوعلي مثل العسل الله يحفظه، والجماعة يعتبرون كلامه من باب النصيحة، بصراحة من زمان كان ودي اعلق على جزئية صغيرة في خطاب العزيز بوعلي توقفت عندها وهي «اذا بتفلونها قولوا لنا خل الناس تخطط لمستقبلها على هالاساس!» اعتقد فيه كلمة خطأ في هالجملة تحديدا، كلمة «خل» لأن المفروض يقول بدالها «خلنا نخطط لمستقبلنا» لانه قادر يخطط وعنده على الاقل اشياء تستاهل انه يخاف ويحرص عليها، اما الناس «المواطن البسيط» شعندهم من تخطيط وشعندهم من اشياء يخافون عليها وشنو هالمستقبل الباهر اللي راح يخططون له اذا اسرة الحكم قالت «لا والله ما نبي الحكم وبنمشي!» ترى كل ثروة المواطن بيت حكومة يحتاج ترميم ورأسماله سيارة مطلوبة بالاقساط ومستشارينه اللي راح يخططون له المستقبل ثلاث عيال عاطلين عن العمل وطايحين بجبده وآخر محادثات تمت بينه وبين السلطة التنفيذية استدعاء من المخفر علشان يدفع تذكرة خدامة منحاشة، هذا كل اللي عند المواطن «الناس» يا بوعلي الله يطول عمرك، شتعتقد الله عليك المواطن بيحكم اذا اسرة الحكم تنازلت عنه؟
٭٭٭
التجار جيدون وعندهم حسن تصرف وتخطيط محكم ويعرفون شلون يدبرون امورهم ويسلكون «المسائل» والدليل السيد مرزوق عقب ما قال «تبون الحكم والا ما تبونه» صار رئيس مجلس الامة، وهو بصراحة يستاهل ذكي وجريء وحط لمعارضته خط رجعه لما ربط قبوله بالصوت الواحد بحكم المحكمة الدستورية، اما ربعنا «مناضلينا» اللهم يا كافي لا يعرفون تخطيطاً ولا سياسة ولا توقيتاً ولا يتفاهمون على طول يدشون في الطوفة، اصلا ما عندهم لا خطوط رجعه ولا تقدم! مثل صاحبنا الله يهديه قالوا له «مستشارينه» اذا تبي طلبك يجاب ارفع سقف الخطاب وعلى طول وبدون مقدمات «لن نسمح لك» وعينك ما تشوف الا النور، صار الله وكيلكم يداوم اربعة وعشرين ساعة في المحاكم وجر نص الشعب معاه، يا عمي قالوا لك ارفع السقف ما قالوا لك هده على رؤوس اللي فيه، يا حبيبي توقيتك خطأ واختيارك للعبارات غلط، هذا مو خطاب سياسي هذي هوشة الله يسلمك ويا ليت عقب الخطاب حصلت على اللي تبيه أو تغير شيء، بالعكس، هذا انت رايح راد على المحاكم تصبح وتمسى على بلاغ، مشكلة ربعنا الله يسلمهم يسمعون بـ«المعارضة» ولا يعرفون معاناها ويبون يصيرون رموزاً ولا يدرون شلون المهم صورهم في الجرايد وتصريحاتهم على الفضائيات وعلى مواقع التواصل الاجتماعي وبهالشكل صاروا معارضة! يا عمي غلط، اركدوا شوي وطالعوا حواليكم شوفوا التجار شلون يعارضون، تعلموا منهم، تعلموا من بوعلي شلون صار رئيس مجلس الامة ومن بوعبدالله اللي خذا مشروع جسر جابر بتكلفة سور الصين العظيم وغيرهم عد وخربط من التجار اللي معارضتهم «سلسة»! الحين انتو لا سقف ولا جدران ولا أرضية!

< نقطة شديدة الوضوح:
نتمنى لكم «حكومة» مفيدة ذات قرارات نافذة، وكل «تشكيل» وأنتم بخير!

مفرج البرجس الدوسري
maldosery@alwatan.com.kw

التعليقات الأخيرة

All Comments

أكثر المواضيع مشاهدة

مقالات ذات صلة بالكاتب

Tweets by WatanNews !function(d, s, id) { var js, fjs = d.getElementsByTagName(s)[0], p = /^http:/.test(d.location) ? 'http' : 'https'; if (!d.getElementById(id)) { js = d.createElement(s); js.id = id; js.src = p + "://platform.twitter.com/widgets.js"; fjs.parentNode.insertBefore(js, fjs); } } (document, "script", "twitter-wjs");

3178.9961


موقع الوطن الإلكترونية – حقوق الطبع والنشر محفوظة