مقالات  
نسخ الرابط
 
  
  
 
  A A A A A
X
dot4line

العقد الفريد

لو استقال المبارك.. واستلم مهاتير محمد!

مفرج الدوسري
2018/03/26   08:34 م

شكرا لتصويت

التقيم التقيم الحالي 5/0
writer image



تحدث سمو الشيخ جابر المبارك عن الفساد، وقامت الساعة، كأن الكويت كانت تحتل المركز (مئة) في مؤشر مدركات الفساد والذي يعني نظيف جداً وفجأة أصبحت تحتل المركز (صفر) والذي يعني فاسد جداً ! على هونكم ياشباب، أصلا بعض اللي علقوا على تصريح الرئيس راكبهم الفساد من روسهم إلى رجليهم، وهذا ليس دفاعاً عن الرئيس ، لكن خلونا نتكلم بواقعية ، أول أبواب الفساد مجلس الأمة اللي انتخبنا أعضاءه بإرادة حرة، أمس ذبحه كل واحد يدافع عن ابن قبيلته وابن طائفته وابن عائلته، حتى ولو كان فاسدا المهم ينجح ويصير نائب، واليوم شوفوهم اللهم لا شماته كل واحد قاعد يفصخ الثاني، حتى اللي كانوا معارضة ورجعوا المجلس طلعت مفاتنهم وكل واحد يتغزل في الثاني ويعريه، تاركين السرقات وشغالين شتايم وتسفل وسب وبذاءة وتخوين ، يعني العلة في اختيارنا، لكن خلونا نعالج المشكلة بطريقة صحيحة إذا كنا فعلاً نبي نحارب الفساد، خلونا نختار صح بعدين نحاسب الحكومة، خلونا ننتخب نواب عليهم القيمة وقادرين يحاسبون الفاسدين ، وخل السلطة ذاك الوقت تحل البرلمان مرة مرتين خمس عشر، وكل ما حلوه نرجع ننتخب ناس مشهود لها بالنزاهة، اتركوا سالفة المعارضة اللي عفا عليها الزمن ونصها فاسد ولا تملك رؤية ، نبي دماء جديدة، نبي شباب واعي نزيه كفاءة ما يتبع حزب ولا يقوده معزب،ذاك الوقت ودعوا الفساد وأهله، أما مسألة كل واحد يتستر على فساد أقربائه وينتخبهم يكرمنا بسكوته!
**
سمو الشيخ جابر المبارك وده ينتشل البلد من الفساد لكن بعض اللي حواليه ما ينشد فيهم الظهر، كل وزير أو متنفذ شاري مجموعة من النواب علشان يدافعون عنه، يعني لو يبدأ الرئيس بالمساءلة أول من يتصدى له نواب التأجير اللي أصبحوا يملكون الملايين، طيب فينا أحد سأل نائب من وين لك كل هالملايين، خلونا نحاسب نوابنا قبل لا نحاسب الحكومة، الحين يطلع واحد محترم ويقول ليش ما يحولون الفاسدين للنيابة؟ خوش سؤال ،اللي حولوهم للنيابة أسماؤهم معروفة لكن من اللي دافع عنهم وطلعهم براءة؟ ومن اللي تصدى للحكومة في البرلمان نيابة عنهم؟ أمس طارت فلوس التأمينات وانحاش البطل ولا تكلم أحد من نواب المعارضة ، ولا واحد جاب طاري الموضوع، ليش فزعة حتى في السرقات؟ العلة فينا، حتى الجمعيات التعاونية والأندية تسرق وحنا اللي زكينا أعضاء مجالس إداراتها، فسادنا أصلي ومعتق، ولو يستقيل جابر المبارك ويستلم مكانه مهاتير محمد والله ما يقعد عندنا ليلتين، رح يضرب مخه، لأن اللي يطالبه بالإصلاح يبي منه التوقيع على خمسين معاملة مخالفة للقانون! والله ينحاش لديرته ويكتب لنا تغريدة (والله ما فيكم طب،واقسم بالله ما تترقعون )!!

نقطة شديدة الوضوح :
المواطن ما له درب على الحكومة إلا عن طريق نواب الأمة اللي انتخبهم وزكاهم،حتى لو كانوا لصوص الحكومة تقول هذا اختياركم، اختاروا صح نشتغل صح، ونتعامل معاكم بشفافية، لكن تنتخبون لصوص وتطالبون بالإصلاح هذي مصيبة!

مفرج البرجس الدوسري
Saifacbrgs@outlook.cm
أخبار ذات صلة dot4line
التعليقات الأخيرة
dot4line
 

265.6223
 
 
 
إعلن معنا
موقع الوطن الإلكترونية – حقوق الطبع والنشر محفوظة
 
Top