فنون  
نسخ الرابط
 
  
  
 
  A A A A A
X
dot4line

الوطن جالت في ثقافتهم عن أسماء الاكلات الكويتية القديمة

منال جاسم: محروق صبعة عيش تحتة خبز!!

2012/07/24   03:49 م

شكرا لتصويت

التقيم التقيم الحالي 0/5
منال جاسم: محروق صبعة عيش تحتة خبز!!



منال جاسم: محروق صبعة عيش تحتة خبز!!

«البراق» منطقة بألمانيا و«الخريط»..طابوق جيري أصفر

مدري شنو اليريش المنهنة...يديد عليّ!


إعداد ألاء وزان:

في شهر رمضان الفضيل تتجدد السفرة الكويتية، وتحضر بعض الأكلات بقوة فتشعر بأن رمضان هل هلاله من نوعية الاطعمة المرتبطة بتاريخ اهل الكويت قديما.
هناك أجيال لا تعرف أسماء أو معنى أو كيفية اعداد وطبخ بعض الأكلات الكويتية القديمة، والتي تلاشى بعضها واختفى...ولبعضها أسماء غريبة لا يعرفها الجيل الجديد، ولمعرفة ثقافة فنانينا عن أسماء بعض أكلات رمضان القديمة خصصنا هالزاوية..واليوم مع مذيعة الوطن منال جاسم:
- شنو يعني «محروق صبعه» كيف تطبخ وما مكوناته.
- أكلة كويتية عيش وتحته خبز، وما عندي فكرة اشلون تنطبخ.
- ما هو «الجرثي»...وما مصدره؟
- الجرثي اهوا اللبنة، وقبل كانوا يسمونها جرثي، وأهلي لي الحين يسمون اللبنة...جرثي.
- شنهي الخبيصة وشلون تحضر؟
- الخبيصة من الحلويات وما أدري عن مكوناتها واشلون يسوونها.
- ما الفرق بين صب القفشة...والخنفروش؟
- الخنفروش سامعة فيه بس ما أذكر شنو، ولفظته مضحكة، وصب القفشة مثل اللقيمات بس سائلة أكثر، وشكلها يختلف وحجمها أكبر، بس طعمها يشابه طعم اللقيمات..
- كيف تصبح «اللقيمات»...كرة مدورة أثناء القلي؟
- سؤال غريب ! أتوقع اذا زدنا عليها شوية روبة تصير مدورة.
- كيف تطبخ العصيدة؟
- ما أعرف شلون يطبخونها..
- شنو يعني حلوة عيش؟ شنو مكوناتها؟
- حلوى العيش عبارة عن نشا وعيش مطبوخ وزعفران.
- من شنو تتكون الرانقينا؟
- تمر أو رطب وينضاف عليها طحين وزيت، ولمن يتحمر نحط دارسين فوقها.
- شنو تعرفين عن قرص العقيلي؟
- كيك من الطحين والبيض، ونضيف عليه هيل وزعفران.
- ما هو لسان الثور ويشبه شنو؟
- لسان الثور يعتبر دوا حق المعدة، وانييبه من الحواي واهوا عشبة.
- جبدة الفرس من وين اييبونها؟
- من الشمالي أو حلويات الوطن هههه، ومشهورة في تركيا شنو ألوان الزلابيا؟ أصفر وبرتقالي، وبرتقالي مايل للأحمر.
- شنهي الباجة؟
- مثل مرقة الكراعين.
- شنو تعرفين عن القبيط؟
- أنا أعرف القبوط، القبيط هذا شنو يطلع!!
- شنو الفرق بين المشخول والجاول؟
- المشخول اهوا العيش المشخول النثري، والجاول عيش ابيض مطبوخ من دون اضافات.
- التشريبة تحبينها باللحم أو الدياي..بخبز رقاق والا خبز ايراني..وما المكونات التي تفضيليتها مع المرقة؟
- باللحم ومع خبز ايراني، واحب المرقة خفيفة ويكون فيها بس بطاط.
- شلون يسوون دقوس صبار؟
- نفس الدقوس العادي ينضاف له التمر الهندي، وينشال منه الطعام.
- ما مكونات الأجار القديم؟
- الأجار مخلل، وأي شي له علاقة بالمخلل ما أحبه..
- شنو الجريش المنهنه؟
- خيالي ما وصلني لليريش المنهنه، حدي اليريش العادي، منهنه شي يديد علي.
- شنو البراق؟
- البراق منطقة في ألمانيا.
- ما مكونات أكل «الميدم»..اذكري ان كنتي تناولتيها مرة..ماذا كانت المناسبة..وأين..ومع من؟
- الميدم سمج مفرفتينه مع العيش، أكلته يوم كنت صغيرة مع أهلي، لأن الأهل وايد يحبون السمج والأكل البحري.
- ما هو البيذان واشلون يسوونة؟
- البيذان اهوا اللوز، ما يسوونه! لأنه مخلوق من الطبيعة، ويشترونه من المطحنة.
- من شنو يسوون اليقط؟
- من حليب الخروف.
- كيف يطبخ البلاليط؟ وكم يحتاج من الوقت وما الاضافات التي تضيفينها على الشعرية..وما مكونات بيض البلاليط؟
- تتحمر الشعرية بالزيت شوي وبعدين نزيد فوقها سكر وزعفران وزيت وهيل، ونص ساعة واتكون جاهزة، بيض البلاليط بيض مخلوط عادي نحطله ملح وفلفل اسود.
- شنو لون الخريط؟ هل هو زرع والا ينزل من السما؟
- لون الخريط أصفر، الى أعرفه ان ينباع في الحواي، وشكله جنه طابوق جيري، وما ادري شنو طعمه.
- ما الفرق بين الألبة والمحلبية؟
- الألبة بيض وحليب، والمحلبية نشا وحليب.
- شلون ينطبخ عيش العنبر؟ وشنو سالفته ومنو عنبر؟
- في شي بالكويت اسمه عيش العنبر!!
- شنو البثيث وشنو الفرق بينه وبين التمرية؟
- البثيث من الحلويات بس ما أدري شنو بالضبط، والتمرية تمر مخلوط بأنواع ثانية من المكسرات والنكهات، وما عندي فكرة شنو الفرق بين البثيث والتمرية.


أخبار ذات صلة dot4line
التعليقات الأخيرة
dot4line
 

85.0027
 
 
 
إعلن معنا
موقع الوطن الإلكترونية – حقوق الطبع والنشر محفوظة
 
Top